محترم رانا ظفراللہ خاں صاحب شہید

روزنامہ ’’الفضل‘‘ ربوہ 15؍اپریل 2011ء میں محترم رانا ظفراللہ خاں صاحب شہید ابن مکرم رانا محمد شریف خاں صاحب سانگھڑ کے بارہ میں چند معلومات شامل اشاعت ہیں جنہیں 18 مارچ 2011ء کو موٹرسائیکل سوار نامعلوم مسلح افراد نے فائرنگ کرکے شہید کردیا تھا۔
شہید مرحوم یکم اپریل 1971ء کو سانگھڑ شہر میں پیدا ہوئے اور 1986ء میں یہیں سے میٹرک کیا۔ آپ الیکٹریشن کا کام جانتے تھے اور شہر میں فوٹو سٹیٹ کی دکان بھی تھی۔ 2007ء میں آپ کی شادی مکرمہ ملیحہ ظفر صاحبہ بنت مکرم رانا عبدالرزاق صاحب آف کراچی سے ہوئی ۔ اللہ تعالیٰ نے آپ کو دو بیٹیاں عطا فرمائیں ۔
آپ بے شمار خوبیوں کے مالک تھے۔ نیک، نہایت شریف النفس اور فدائی احمدی تھے۔ بہت متوکّل اور منکسرالمزاج تھے۔ خوش مزاج تھے اور کبھی غصہ میں نہیں آتے تھے۔ خلافت سے بہت پیار تھا۔ مالی قربانی بڑھ چڑھ کر کرتے اور نظام کی کامل اطاعت کرتے تھے۔