نور سیرت کی چمک تابندگی کیا بات ہے — نظم

(مطبوعہ الفضل ڈائجسٹ، روزنامہ ’’الفضل انٹرنیشنل‘‘ لندن 2026ء)

جماعت احمدیہ امریکہ کے ماہنامہ ’’النور‘‘ دسمبر2014ء میں مکرمہ امۃالباری ناصر صاحبہ کی ایک مختصر نظم شائع ہوئی ہے جو حضرت اقدس مسیح موعودؑ کے نعتیہ کلام سے متأثر ہوکر کہی گئی ہے۔ یہ نظم ہدیۂ قارئین ہے:

نور سیرت کی چمک تابندگی کیا بات ہے
حُسنِ صورت کی دمک اور روشنی کیا بات ہے
وہ شہِ کَون و مکاںؐ اور بوریے کا تخت و تاج
عجز کہتے ہیں کسے اور سادگی کیا بات ہے
حضرت اقدسؑ کی نعتیں پڑھ کے یہ کھلنے لگا
عشق کہتے ہیں کسے اور عاشقی کیا بات ہے
وہ سراپا نُور ہے نظروں میں ہم کو علم ہے
چاند کہتے ہیں کسے اور چاندنی کیا بات ہے
نیم شب کی گریہ و زاری سکھاتی ہے ہمیں
عبد کہتے ہیں کسے اور بندگی کیا بات ہے
دل میں ہے شوقِ شہادت کاش وہ چُن لے مجھے
کام آئےدین کے یہ زندگی کیا بات ہے