ارض و سما کی وسعتیں ہیں آپؐ کے لئے – نعتیہ کلام

روزنامہ ’’الفضل‘‘ ربوہ 26؍اپریل 2012ء میں شاملِ اشاعت مکرم یعقوب امجدؔ صاحب کے نعتیہ کلام سے انتخاب پیش ہے:

ارض و سما کی وسعتیں ہیں آپؐ کے لئے
کون و مکاں کی رفعتیں ہیں آپؐ کے لئے
ساری بہاریں آپؐ کے نقشِ قدم سے ہیں
لولاک کی سب نعمتیں ہیں آپؐ کے لئے
تیرے غلام بن کے ہم شاہِ جہاں بنے
لاریب ساری عظمتیں ہیں آپؐ کے لئے
نام و نسب کو بھول کر تجھ پر فدا ہوئے
قربان ساری نسبتیں ہیں آپؐ کے لئے
دونوں جہاں میں پا گیا اعزاز کا نشاں
جس نے اٹھائی ذلتیں ہیں آپؐ کے لئے
ہم بے بسوں پہ آپؐ کا ہو التفاتِ خاص
خدام کی سب خدمتیں ہیں آپؐ کے لئے