حضرت مولانا غلام رسول صاحب راجیکیؓ کی قبولیتِ دعا

(مطبوعہ رسالہ انصارالدین جولائی و اگست اور ستمبرواکتوبر 2023ء- دو اقساط)

(ملخّص از ’’حیات قدسی‘‘۔ مرتّبہ: ڈاکٹر سر افتخار احمد ایاز)

حضرت مولوی غلام رسول صاحب راجیکی رضی اللہ عنہ نے اپنی پاکیزہ حیات کے سینکڑوں ایمان افروز واقعات اپنی کتاب ’’حیات قدسی‘‘ میں بیان فرمائے ہیں۔ ذیل میں اس کتاب میں سے ایک انتخاب حضرت مولوی صاحبؓ کے الفاظ میں ہی ہدیۂ قارئین ہے۔ آپؓ فرماتے ہیں:
اللہ تعالیٰ سیدنا حضرت مسیح موعود علیہ الصلوٰۃ والسلام کے عہد نبوت کے توسط سے اپنی یقینی تجلّیات کے ساتھ مجھ ذرّہ ٔ حقیر پر ظاہر ہوا۔ چنانچہ ابتدائی زمانہ میں جب علماء سوء گاؤں گاؤں میری کم علمی اور کفر کا چرچا کررہے تھے مجھے میرے خدا نے الہام کے ذریعہ بشارت دی: ’’مولوی غلام رسول جوان صالح کراماتی‘‘۔
چنانچہ اس الہام الٰہی کے بعد جہاں اللہ تعالیٰ نے مجھے بڑے بڑے مولویوں کے ساتھ مباحثات کرنے میں نمایاں فتح دی ہے میرے ذریعہ سیدنا حضرت امام الزمان علیہ السلام کی برکت سے انذاری اور تبشیری کرامتوں کااظہار بھی فرمایا ہے جن کا ایک زمانہ گواہ ہے۔

بعض انذاری و تبشیری کرامتوں کا ذکر

مَیں ایک مرتبہ موضع گڈہو، جو ہمارے گاؤں سے قریباً ڈیڑھ کوس کے فاصلہ پر واقع ہے، گیا چونکہ اس گاؤں کے اکثر لوگ ہمارے خاندان کے حلقہ ارادت میں داخل تھے اس لیے میں نے یہاں کے بعض آدمیوں کو احمدیت کی تبلیغ کی اور واپسی پر اُس موضع کی ایک مسجد کے برآمدہ میں اپنی ایک پنجابی نظم کے کچھ اشعار جو سیدنا حضرت مسیح موعود دعلیہ الصلوٰ ۃ والسلام کی آمد کے متعلق تھے لکھ دیے۔ اتفاق کی بات ہے کہ اس موضع کا نمبردار چوہدری اللہ بخش اس وقت کہیں مسجد میں طہارت کر رہا تھا اس نے مجھے مسجد سے باہر نکلتے ہوئے دیکھ لیا۔ ادھر راستہ میں یہاں کے امام مسجد مولوی کلیم اللہ نے بھی مجھے دیکھا۔ جب یہ دونوں آپس میں ملے تو انہوں نے میرے جنون احمدیت کا تذکر ہ کرتے ہوئے مسجد کے برآمدہ میں ان اشعار کو پڑھا اور یہ خیال کرتے ہوئے کہ اب ہماری مسجد اس مرزائی نے پلید کردی ہے یہ تجویز کیا کہ سات مضبوط نوجوانوں کو میرے پیچھے دوڑایا جائے جو میری مشکیں باندھ کر مجھے ان کے پاس لے آئیں اور پھر میرے ہاتھوں سے ہی میرے لکھے ہوئے اشعار کومٹوا کرمجھے قتل کردیا جائے۔ چنانچہ انہوں نے اس منصوبہ کو عملی جامہ پہنانے کے لیے سات جوانوں کو میرے پیچھے دوڑا دیا۔ مگر اس زمانہ میں مَیں بہت تیز چلنے والاتھا اس لیے مَیں نوجوانوں کے پہنچنے سے پہلے ہی اپنے گاؤں آگیا اور وہ خائب و خاسر واپس لوٹ گئے۔ دوسرے دن اسی گاؤں کا ایک باشندہ جو والد صاحب کا مرید تھا اور ان لوگوں کے بدارادوں سے واقف تھا صبح ہوتے ہی ان کی خدمت میں حاضر ہوا اور سارا ماجرا کہہ سنایا۔ والد صاحب نے اس کی باتیں سنتے ہی مجھے فرمایا کہ جب ان لوگوں کے تیرے متعلق ایسے ارادے ہیں تو احتیاط کرنی چاہئے میں نے جب یہ واقعہ اور محترم والد صاحب کا فرمان سنا تووضو کرکے نماز شروع کردی اور اپنے مولا کریم کے حضور عرض کیا کہ اے میرے مولاکریم کیا یہ لوگ مجھے تیرے مسیح کی تبلیغ سے روک دیں گے اور کیا میں اس طرح تبلیغ کرنے سے محروم رہوں گا۔ یہ دعا میں بڑے اضطراب اور قلق سے مانگ رہا تھا کہ مجھے جائے نماز پر ہی غنودگی سی محسوس ہوئی اور مَیں سوگیا۔ سونے کے ساتھ ہی میرا غریب نواز خدا مجھ سے ہم کلام ہوا اور نہایت رافت ورحمت سے فرمانے لگا:’’وہ کون ہے جوتجھے تبلیغ سے روکنے والا ہے اللہ بخش نمبردار کو میں آج سے گیارہویں دن قبر میں ڈال دوں گا۔‘‘
صبح میں ناشہ کرتے ہی موضع گڈہو پہنچا اورجاتے ہی اللہ بخش نمبردار کا پتہ پوچھا۔ لوگوں نے کہا کیا بات ہے؟ میں نے کہا اس کے لیے ایک الٰہی پیغام لایا ہوں اور وہ یہ ہے کہ اللہ بخش آج سے گیارہویں دن قبر میں ڈالا جائے گا۔ کہنے لگے وہ تو موضع لالہ چک جو گجرات سے مشرق کی طرف چند کوس کے فاصلہ پرایک گاؤں ہے وہاں چلا گیا ہے۔ میں نے کہا کہ پھر تم لوگ گواہ رہنا کہ وہ گیارہویں دن قبر میں ڈال دیا جائے گا اورکوئی نہیں جو اس خدائی تقدیر کو ٹال سکے۔ میرا یہ پیغام سنتے ہی اہل محفل پر ایک سناٹا چھاگیا۔ اب وہ تقدیر مبرم اس طرح ظہور میں آئی کہ چوہدری اللہ بخش ذات الجنب اور خونی اسہالوں سے لالہ چک میں بیمار ہوگیا۔ مرض چند دنوں میں ہی اتنا بڑھا کہ اس کے رشتہ دار اسے لالہ چک سے اُٹھاکر گجرات کے ہسپتال میں لے گئے اوروہاں وہ ٹھیک گیارہویں دن اس دنیا فانی سے کوچ کر گیا اور اسے اپنے وطن موضع گڈہو کا قبرستان بھی نصیب نہ ہوا۔ فَاعْتَبِرُوْا یٰٓاُولِی الْاَبْصَارِ (الحشر:3) ترجمہ:’’پس اے سمجھ بوجھ رکھنے والے لوگو! عبرت حاصل کرو ‘‘۔ اس پیشگوئی کی اطلاع چونکہ موضع گڈہو، موضع سعد اللہ پوراور بعض دوسرے دیہات کے آدمیوں کو پہلے سے پہنچا دی گئی تھی اس کے عین وقت پر پورا ہونے سے اکثرلوگوں پردہشت سی طاری ہوگئی۔

موضع دھدرہا کا واقعہ

ایسا ہی موضع دھدرہا میں جو ہمارے گاؤں سے جانب جنوب مغرب ایک کوس کے فاصلہ پر واقع ہے جب میں تبلیغ کے لیے جاتا تو وہاں کا مُلّاں محمد عالم لوگوں کو میری باتیں سننے سے روکتا اور اُس فتویٰ کفر کی جو مجھ پرلگایا گیا تھا جابجا تشہیر کرتا۔ آخر اس نے موضع مذکور کے ایک مضبوط نوجوان جیون خان نامی کو جس کا گھرانہ جتھے کے لحاظ سے بھی گاؤں کے تمام زمینداروں پر غالب تھا میرے خلاف ایسا بھڑکایا کہ وہ میرے قتل کے درپے ہوگیا اورمجھے پیغام بھجوایا کہ اگر اپنی زندگی چاہتے ہو تو ہمارے گاؤں کارخ نہ کرنا ورنہ پچھتانا پڑے گا۔ مَیں نے جب یہ پیغام سنا تو دعا کے لیے نماز میں کھڑا ہوگیا اورخدا کے حضور گڑگڑا کردعا کی تب اللہ تعالیٰ نے جیون خان اور مُلّاں محمد عالم کے متعلق مجھے الہاماً سورۃاللّھب کی دوسری و تیسری آیت بتائی۔ (ترجمہ:’’شعلہ کے باپ کے دونوں ہاتھ ہی شل ہوگئے ہیں اور وہ (خود) ہی شل ہوکر رہ گیا ہے۔ اس کے مال نے اسے کوئی فائدہ نہیں دیا اور نہ اس کی کوششوں نے (کوئی فائدہ) دیا ہے۔‘‘)
اس القاء ربانی کے بعد مجھے دوسرے دن ہی اطلاع ملی کہ جیون خاں شدید قولنج میں مبتلا ہوگیا ہے اور مُلّاں محمد عالم ایک بداخلاقی کی بِنا پر مسجد کی امامت سے علیحدہ کر دیا گیا ہے۔ پھر قولنج کے دورہ کی وجہ سے جیون خاں کی حالت یہاں تک پہنچی کہ چند دنوں کے اندر وہ قوی ہیکل جوان، مشت استخوان ہو کر رہ گیا اور اس کے گھروالے جب ہر طرح کی چارہ جوئی کرکے اس کی زندگی سے مایوس ہوگئے تو اس نے کہا کہ میرے اندر یہ وہی کلہاڑیاں اور چھریاں چل رہی ہیں جن کے متعلق مَیں نے میاں غلام رسول راجیکی والے کو پیغام دیا تھا۔ اگر تم میری زندگی چاہتے ہو تو خدا کے لیے اسے راضی کرو اور میراگناہ معاف کراؤ ورنہ کوئی صورت میرے بچنے کی نہیں۔ آخراس کے نودس رشتہ دار باوجود مُلّاں محمد عالم کے روکنے کے ہمارے گاؤں کے نمبردار کے پاس آئے اور اسے میرے راضی کرنے کے لیے کہا اس نے جواب دیا کہ میاں صاحب اگرچہ ہماری برادری کے آدمی ہیں مگر ان کے گھرانے کی بزرگی کی وجہ سے آج تک ہمارا کوئی فرد ان کی چارپائی پربیٹھنے کی جرأت نہیں کرتا۔ میں تو ڈرتا ہوں کہ کہیں اس قسم کی باتوں میں ان کی کوئی بےادبی نہ ہوجائے۔ بالآخر وہ ہمارے نمبردار کو لے کر میرے والد صاحب محترم اور میرے چچا میاں علم الدین صاحب اور حافظ نظام الدین صاحب کے ہمراہ میرے پاس آئے اور اپنے سروں سے پگڑیاں اتار کر میرے پاؤں پر رکھ دیں اورچیخیں مار مار کر رونے لگے اور کہنے لگے اب یہ پگڑیاں آپ ہمارے سروں پر رکھیں گے تو ہم جائیں گے ورنہ یہ آپ کے قدموں پر ہی دھری رہیں گی۔ ان کی اس حالت کو دیکھ کرمیرے والد صاحب اور میرے چچوں نے ان کومعاف کرنے کی سفارش کی جسے بالآخرمیں مان کر اپنے بزرگوں کی معیت میں ان لوگوں کے ساتھ دھدرہا پہنچا۔ جیون خان نے مجھے آتے ہوئے دیکھا تو میری توبہ میری توبہ کہتے ہوئے میرے سامنے ہاتھ جوڑدیے اور اتنا رویا اورچِلّایا کہ اس کی اس گریہ و زاری سے اس کے تمام گھروالوں نے بھی رونا اور پیٹنا شروع کردیا۔ اس وقت عجیب بات یہ ہوئی کہ وہ جیون خان جسے علاقہ کے طبیب لاعلاج سمجھ کر چھوڑگئے تھے ہمارے پہنچتے ہی افاقہ محسوس کرنے لگا اور جب تک ہم وہاں بیٹھے رہے وہ آرام سے پڑا رہا مگر جب ہم اپنے گاؤں کی طرف لَوٹے تو پھر کچھ دیر کے بعد اس کے دردوکرب کی وہی حالت ہوگئی جس کی وجہ سے پھر اس کے رشتہ داروں نے مجھے بلانے کے لیے آدمی بھیجا اورمیں والد صاحب اور اپنے چچوں کے فرمانے پر اس آدمی کے ہمراہ جیون خان کے گھر چلا آیا۔ یہاں پہنچتے ہی اس گھر کی تمام عورتوں اورمَردوں نے نہایت منت وزاری سے مجھے کہا کہ جب تک جیون خاں کو صحت نہ ہوجائے آپ ہمارے گھر ہی تشریف رکھیں اور اپنے گاؤں نہ جائیں۔ ادھر مُلّاں محمد عالم اوراس کے ہمنواؤں نے جب میری دوبارہ آمد کی خبر سنی تو جابجا اس بات کا ڈھنڈورا پیٹنا شروع کردیا کہ وہ مریض جسے علاقہ بھرکے اچھے طبیب لاعلاج بتاچکے ہیں اوراب لبِ گورپڑا ہوا ہے، یہ مرزائی اسے کیا صحت بخشے گا۔ یہ باتیں جب میرے کانوں میں پہنچیں تو میں نے جوشِ غیرت کے ساتھ خدا کے حضور جیون خان کی صحت کے لیے نہایت الحاح اور توجہ سے دعا شروع کردی۔ چنانچہ ابھی ہفتہ عشرہ بھی نہیں گزرا تھا کہ جیون خان کو خداتعالیٰ نے سیدنا حضرت مسیح موعود علیہ السلام کی اعجازی برکتوں کی وجہ سے دوبارہ زندگی عطا فرمادی اور وہ بالکل صحت یاب ہوگیا۔ اس کرشمہ قدرت کا ظاہر ہونا تھا کہ اس گاؤں کے علاوہ گردونواح کے اکثر لوگ بھی حیرت زدہ ہوگئے اور جابجا اس بات کا چرچا کرنے لگ گئے کہ آخر مرزا صاحب کوئی بہت بڑی ہستی ہیں جن کے مریدوں کی دعا میں اتنا اثر پایا جاتا ہے۔

موضع جاموں بولا کا واقعہ

موضع جاموں جو ہمارے گاؤں سے جانب شمال دو کوس کے فاصلہ پر واقعہ ہے۔ وہاں کے اکثر زمیندار ہمارے بزرگوں کے ارادتمند تھے۔ جب انہوں نے جیون خان ساکن دھدرہا کی معجزانہ بیماری اور معجزانہ صحت یابی کا حال سنا تو ان میں سے خان محمد زمیندار میرے والد صاحب بزرگوار کی خدمت میں حاضر ہو ااور عرض کیا کہ میرا چھوٹا بھائی جان محمد عرصہ سے تپ دق کے عارضہ میں مبتلا ہے آ پ ازراہ نوازش میاں غلام رسول صاحب سے فرمائیں کہ وہ کچھ روز ہمارے گھر پر ٹھہریں اور جان محمد کے لیے دعا کریں تاکہ اللہ تعالیٰ اسے بھی صحت عطا فرمادے۔ چنانچہ اس کی اس درخواست پر والد صاحب کے ارشاد کے ماتحت میں ان کے یہاں چلا آیا اور آتے ہی وضو کرکے نمازمیں اس کے بھائی کے لیے دعا شروع کردی۔ سلام پھیرتے ہی میں نے ان سے دریافت کیا کہ اب جان محمد کی حالت کیسی ہے؟ گھر والوں نے جواب دیا کہ بخار بالکل اتر گیا ہے اور کچھ بھوک بھی محسوس ہوتی ہے چنانچہ اس کے بعد چند دنوں کے اندر ہی اس کے نحیف و ناتواں جسم کے اندر اتنی طاقت آگئی کہ وہ چلنے پھرنے لگ گیا۔ اس نشا ن کو دیکھ کر اگرچہ ان لوگوں کے اندر احمدیت کے متعلق کچھ حسن ظنی پیدا ہوئی مگر سیدنا حضرت مسیح موعود علیہ السلا م کے حلقہ بیعت میں کوئی شخص نہ آیا۔ جس کا نتیجہ یہ ہوا کہ اللہ تعالیٰ نے مجھے فرمایا کہ اس مریض کو جو صحت دی گئی ہے وہ ان لوگوں پر اتمام حجت کی غرض سے ہے اور اگر انہوں نے احمدیت کو قبول نہ کیا تو یہ مریض اسی شعبان کے مہینہ کی اٹھائیسویں تاریخ کی درمیانی شب قبر میں ڈالا جائے گا۔ چنانچہ میں نے بیدار ہوتے ہی قلم اور دوات منگوائی اور یہ الہام الہٰی کاغذ پر لکھا اور اسی گاؤں کے بعض غیراحمدیوں کو دے دیا اور انہیں تلقین کی کہ اس پیشگوئی کی تعیین کو موت کے عرصہ سے پہلے ظاہر نہ کریں۔ اس کے بعد سیدنا حضرت مسیح موعود علیہ السلام کی بارگاہ اقدس میں قادیان چلا آیا اور یہیں رمضان المبارک کا مہینہ گزارا۔ خدا تعالیٰ کی حکمت ہے کہ جب جان محمد بظاہر صحت یاب ہوگیا اور جابجا اس معجزہ کا چرچا ہونے لگا تو اس مرض نے دوبارہ حملہ کیا اور وہ ٹھیک شعبان کی اٹھائیسویں رات اس دنیائے فا نی سے کوچ کرگیا۔ اس کے مرنے کے بعد جب ان غیراحمدیوں نے میری تحریر لوگوں کے سامنے رکھی تو ان کی حیرت کی کوئی انتہا نہ رہی۔ مگر افسوس کہ پھر بھی انہوں نے احمدیت کو قبول نہ کیا۔

تہی دستان قسمت راچہ سوداز رہبر کامل
کہ خضر از آب حیواں تشنہ مَے آرد سکندررا

مو ضع سعداللہ پور کا واقعہ

موضع سعداللہ پور جو ہمارے گاؤں سے جانب جنوب کوئی تین کوس کے فاصلہ پر واقعہ ہے۔ یہاں کے اکثر حنفی لوگ بھی ہمارے بزرگوں کے ارادتمند تھے اس لیے میں کبھی کبھار اس موضع میں تبلیغ کی غرض سے جایا کرتا تھا اور ان لوگوں کو حضرت مسیح موعود علیہ السلام کی صداقت سمجھانے کی کوشش کرتا رہتا تھا۔ اس موضع میں مولوی غوث محمد ایک اہل حدیث عالم تھے اور امرتسر کے غزنوی خاندا ن سے نسبت تلمذ رکھنے کی وجہ سے احمدیت کے سخت معاند اور مخالف تھے۔ میں نے ایک روز ان کی موجودگی میں ظہر کے وقت مسجد میں لوگوں کو احمدیت کی تبلیغ کی اور انہیں بھی سیدنا حضرت مسیح موعود علیہ السلام کی کچھ کتابیں اور رسالے مطا لعہ کے لیے دیے۔ جب انہیں اس تبلیغ کے ذریعہ اور حضور اقدسؑ کی کتابوں سے یہ علم ہو ا کہ میں حضرت مسیح موعود کو امام مہدی تسلیم کرتا ہوں تو انہوں نے میرے حق میں بےتحاشا فحش گوئی شروع کردی اور سیدنا حضرت مسیح موعود علیہ السلام کی ذات والا صفات کے بارہ میں بھی۔ میں نے انہیں کہا کہ گالیاں مجھے دے لیں لیکن حضرت اقدس علیہ السلام کی توہین نہ کریں مگر وہ اس سے باز نہ آئے۔ آخر چاروناچار میں تخلیہ میں جاکر سجدہ میں گر پڑا اور رو رو کر بارگاہ ایزدی میں دعا مانگی اور رات کو بغیر کھانا کھائے ہی مسجد میں آکے سو گیا۔ جب سحری کے قریب وقت ہوا تو مولوی غوث محمد صاحب مسجد میں میرے پاس پہنچے اور معافی مانگتے ہوئے مجھے کہنے لگے: خدا کے لیے ابھی حضرت میرزا صاحب کو میری بیعت کا خط لکھو ورنہ میں ابھی مرجاؤں گا اور دوزخ میں ڈالا جاؤں گا۔ مَیں نے جب ان کا احمدیت کی طرف رجوع دیکھا تو حیران ہوکر اس کی وجہ دریافت کی۔ مولوی صاحب نے بتایا کہ رات مَیں نے خواب میں دیکھا ہے کہ قیامت کا دن ہے اور مجھے دوزخ میں ڈالے جانے کا حکم صادر ہوا ہے اور اس کی تعمیل کرانے کے لیے بڑی بھیانک شکل کے فرشتے میرے پاس آئے ہیں اور ان کے پاس آ گ کی بنی ہوئی اتنی بڑی بڑی گرزیں ہیں جو بلندی میں آسمان تک پہنچتی ہیں۔ انہوں نے مجھے پکڑا ہے اور کہتے ہیں کہ تم نے مسیح موعود اور امام زمانہ کی شان میں گستاخی کی ہے اس لیے اب دوزخ کی طرف چلو اور اس کی سزا بھگتو۔ میں نے ڈرتے ہوئے ان کی خدمت میں عرض کیا کہ میں توبہ کرتا ہوں آ پ مجھے چھوڑ دیجئے۔ انہوں نے کہا کہ اب توبہ کرتا ہے۔ اور ما رنے کے لیے اپنا گرز اٹھا یا جس کی دہشت سے میں بیدار ہوگیا اور اب آ پ کی خدمت میں حاضر ہوا ہوں کہ خدا کے لیے آ پ میرا قصور معاف فرمائیں اور حضرت مرزا صاحب کی خدمت میں میری بیعت کا خط لکھ دیں۔ چنانچہ اس خوا ب کی بِنا پر آپ احمدی ہو گئے اوراس کے بعد ہم دونوں کی تبلیغ سے اس گاؤں کے بیسیوں مرد اور عورتیں سلسلہ احمدیہ میں داخل ہوگئے۔ فَالْحَمْدُلِلّٰہ عَلیٰ ذالِک

الٰہی بشارت اور موضع خوجیانوالی کا واقعہ

انہی ایام کا ذکر ہے کہ میں نے رؤیا میں دیکھا کہ موضع راجیکی میں ہمارے مکان کی چھت پر اللہ تعالیٰ نے میری والدہ ماجدہ کے تمثل میں جلوہ فرمایا ہے اور مجھے مخاطب کرتے ہوئے فرماتا ہے: اِنّا فَتَحْنَا لَکَ فَتْحًا مُبِیْنَا (الفتح2:)
ترجمہ: ’’ہم نے تم کو ایک کھلی کھلی فتح بخشی ہے‘‘۔
اس بشارت الٰہی کے بعد موضع پاد شہانی ضلع جہلم کا مولوی احمد دین جو احمدیوں کے خلاف لوگوں کو اشتعال دلانے میں حد درجہ زبان شر رکھتا تھا موضع خوجیانوالی جو ہمارے گاؤں سے تقریبًا چار کوس کے فاصلہ پر واقع ہے، آیا۔ اور آتے ہی اس نے اپنی تقریر میں کہا کہ جن دیہا ت میں مرزائی پائے جاتے ہیں وہ اس کنویں کی طرح ہیں جس میں خنزیر پڑا ہوا ہو۔ پس گاؤں والے گاؤں کو اور اپنے آپ کو پاک رکھنا چاہتے ہیں تو ان مرزائیوں کو باہر نکال دیں۔ اس قسم کی تقریروں کا سلسلہ جب کچھ روز جاری رہا تو لوگوں میں ہر طرف ہماری عداوت کے شعلے بھڑک اٹھے اور ایک جمعہ کے دن جبکہ لوگ جمعہ پڑھنے کے لیے با ہرسے بھی آئے ہوئے تھے اور اس طرح موضع خوجیانوالی میں گردو نواح کے ہزارہا لوگوں کا اجتماع ہوگیا تھا۔ اس مولوی نے لوگوں کو احمدیت کے خلاف بہت اشتعال دلایا۔ مَیں ان دنوں چونکہ تبلیغ کی غرض سے موضع رجوعہ اور موضع ہیلاں تحصیل پھالیہ گیا ہوا تھا اس لیے میرے بعد احمدی احباب اس مولوی کی فتنہ پردازیوں سے سخت خائف ہوگئے۔ آخر بعض مولویوں کے یقین دلانے پر کہ مرزائیوں میں کوئی بھی مجمع میں تقریر کرنے کی جرأت نہیں رکھتا جب مولوی احمددین نے ہما رے احمدیوں کومقابلہ کا چیلنج دیا تو اس علاقہ کے احمدیوں میں سے مولوی امام الدین صاحب ؓ اور مولوی غوث محمد ؓ صاحب وغیرہ نے ہما رے چودھری مولاداد وڑائچ احمدی سا کن لنگھ کو میرے بلانے کے لیے مو ضع ہیلاں بھیجا۔ چنانچہ میں اطلاع پا تے ہی گھوڑی پر سوار ہوکر موضع خوجیانوالی پہنچ گیا اور آ تے ہی ایک عربی خط لکھ کر مولوی احمددین کے پا س بھیجا جسے وہ اپنی کم علمی کی وجہ سے پڑھنے سے قا صر رہا اور جیب میں ڈالتے ہوئے میری طرف پیغام بھیجا کہ آپ یہاں آکر منبر پر چڑھ کر تقریر کریں۔ چنا نچہ مَیں مع احباب وہاں پہنچتے ہی منبر کے قریب گیا اور اسے کہا کہ آپ منبر سے نیچے اتریں مَیں تقریر کرتا ہوں تو اس نے انکا ر کیا اور کہا کہ رسول کے منبر پر مَیں کافر کو تقریر نہیں کرنے دوں گا اور اس طرح اس نے مجھے تقریر کرنے سے روک دیا۔ اور حضور اقدس علیہ السلام کی کتاب ازالہ اوہام نکال کر اِنَّا اَنْزَلْنَاہُ قَرِیْبًا مِّنَ الْقَادِیَانِ کے الہا م پر اعتراضا ت شروع کر دیے۔ اور اُس کی جہالت کا نمونہ یہ تھا کہ لفظ دائیں کو دائین موقوف پڑھا۔ جب مَیں نے جوابات دے کر لوگوں پر اس کی بےعلمی کو واضح کیا تو اُس نے اپنی خفت مٹانے کے لیے مجھے ایک تھپڑ مارا جو میرے منہ کی بجائے میرے عمامہ پر لگا اور وہ میرے سر سے کچھ سرک گیا۔ اس بدتمیزی کو دیکھ کر حاضرین میں سے چوہدری جان محمد نمبردار وڑا ئچ اور چوہدری ہست خا ن مانگٹ اٹھے اوراس مولوی کو بہت ہی ڈانٹا اور ملامت کی اور جتنا مجمع تھا منتشر ہوگیا۔
اس موقع پر خداتعالیٰ کے فضل سے چند منٹوں میں ہی سیدنا حضرت مسیح موعود علیہ السلام کا نام اور دعویٰ کا اعلان ہزارہا لوگوں تک پہنچ گیا اوراس مولوی کی بےعلمی اور بدتمیزی واضح ہوگئی۔ دوسرے دن جب مجھے معلوم ہوا کہ مولوی احمددین ابھی اسی گاؤں کی ایک مسجد میں ہے تو میں نے یہاں کے چوہدری نمبردار جان محمد کو کہا کہ میں سیدنا حضرت مسیح موعود علیہ السلام کے دعویٰ کو قرآن مجید اور احادیث اوراسلام کی رُو سے تسلیم کرکے اپنی ساری قوم اور آپ لوگوں سے مذہب کی بِنا پر علیحدہ ہوا ہوں اس لیے بہتر ہے کہ آپ لوگ مولوی احمد دین کو بلاکر میرے ساتھ گفتگو کرائیں تاکہ جس شخص کے پاس سچائی ہے لوگوں کو معلوم ہوجائے۔ چوہدری جان محمد نے کہا کہ بات تو معقول ہے، ہم ابھی مولوی احمد دین کو کہتے ہیں۔ چنا نچہ جب انہوں نے مو لوی احمد دین کو میرا یہ پیغام سنایا تو وہ کہنے لگا کہ مجھے معلوم ہوا ہے کہ اس موضع کے تمام زمیندار مولوی غلام رسول راجیکی کی قوم کے لوگ ہیں اس لیے میں ڈرتا ہوں کہ یہاں کوئی فساد نہ ہوجائے۔ مَیں نے کہلا بھیجا کہ مولوی احمد دین صاحب! جیسا بھی آپ چا ہیں اپنے امن و تحفظ کے متعلق تسلی کرلیں مگر میرے ساتھ گفتگو ضرور کریں۔ اس کے بعد مولوی احمد دین نے گھوڑی منگوائی اور موضع گڈہو بھاگ گیا۔ جہاں چند روز قیام کے بعد لوگوں کو معلوم ہوا کہ اسے آتشک ہوگئی ہے۔ پھر وہاں سے وہ اپنے وطن ضلع جہلم چلا گیا اور دوبارہ ہمارے علاقہ میں آ نے کی اس کو جرأت نہ ہوسکی اور سنا کہ وہ وہا ں وطن میں جلد ہی مرگیا۔ اور دنیا میں اسے رہنے کے لیے زیادہ مہلت نہ مل سکی۔ مولوی احمد دین کی اس شکست فاش کو دیکھ کر بھی جب موضع خوجیانوالی کے لوگوں کی آنکھیں نہ کھلیں تو میں نے چند ماہ موضع مذکور میں قیام کیا اوران لوگوں کو سمجھا یا مگر پھر بھی ان لوگوں پر کوئی اثر نہ ہوا تومیں نے رات خواب میں دیکھا کہ اس گاؤں پر طاعون نے ایسا حملہ کیا ہے کہ گھروں کے گھر ویران ہوگئے ہیں چنانچہ ابھی کچھ دن ہی گزرے ہوں گے اس خواب کی تعبیر وقوع میں آئی اور یہاں کے تقریباً گیارہ سو آدمی طاعون کا شکار ہوگئے۔ لوگوں نے جب دیکھا کہ ارد گرد کے دیہات میں بالکل امن ہے اور یہاں ایک قیا مت برپا ہے تو ان میں سراسیمگی پیدا ہوئی اور آپس میں کہنے لگے آخر اس عذاب کی کیا وجہ ہوسکتی ہے۔ اس وقت ایک آدمی نے بتایا کہ رات خواب میں مَیں نے دیکھا ہے کہ لوگ اس تباہی کے متعلق چہ میگوئیاں کر رہے ہیں تو ایک بزرگ انسان یا فرشتہ ظاہر ہوا ہے اور اس نے بتایا ہے کہ اس تباہی کا موجب وہ تھپڑ ہے جو خدا کے ایک بندے کو خدا کا حکم سناتے ہوئے اس گاؤں میں مارا گیا تھا۔

میرے گاؤں مو ضع راجیکی وڑائچاں کے بعض واقعا ت

ایک رؤیا جس میں گیارہ انبیاء علیہم السلام نے مجھے کنویں سے نکالا تھا، ان کومیں نے جاتے ہوئے دیکھا۔ میں نے پوچھا یہ کون لوگ ہیں؟ تو انہی انبیاء علیہم السلام میں سے کسی نے فرمایا کہ یہ لو گ یوسف کے گیارہ بھائی ہیں۔ اس رؤیا کی تعبیرجو بعد میں ظاہر ہوئی یہ تھی کہ میرے احمدی ہونے کے بعد میرے جدامجد حضرت میاں نور صاحب چنابی علیہ الرحمتہ کی اولاد کے گیارہ گھرانے جو اس وقت موجود تھے انہی کے بعض افراد یوسف کے بھائیوں کی طرح میری مخالفت و عداوت پر کمربستہ ہوگئے اور دوردور سے علماء کو بلا کر میری تکفیر کا موجب ہوئے۔ پھر بغض و عِناد یہاں تک پہنچا کہ میرے ان قرابت داروں میں سے بعض نے مجھ پر نقص امن اور اقدام قتل کا جھوٹا الزام لگاکر عدالت میں دعویٰ دائر کردیا مگر وہ خدا جو زمین و آسمان کا خدا ہے اور وہ خدا جس کی رضا کے لیے میں نے ان لوگوں کے مسلک کو چھوڑا تھا وہ میری فریاد رسی کے لیے پہنچا اور ان کے منصوبوں کو خاک میں ملا دیا مگر افسوس صد افسوس کہ پھر بھی ہمارے بعض قریبی رشتہ داروں اور ہمارے گاؤں کی وڑائچ برادری کو میرے سید و مسیح قا دیانی کی صداقت قبول کرنے کی توفیق نہ ملی اور اکثر اس مائدہ آسمانی سے فائدہ اٹھانے سے محروم رہ گئے۔

اعجازنما واقعہ صداقت (قُمْ بِاِذْنِ اللّٰہ)

اسی زمانہ میں جب کہ میں اپنے گاؤں اور علاقہ کے لوگوں کو احمدیت کی تبلیغ کیا کرتا تھا بعض بڑی عمر کے بوڑھے مجھے کہا کرتے تھے کہ تم تو بچے ہو اگر مرزا صاحب کے دعوے میں کوئی صداقت ہوتی توآپ کے تایا حضرت میاں علم الدین صاحب جو اس زمانہ کے غوث اور قطب ہیں اور چالیس سپارے قرآن مجید کے ہرروز پڑھتے ہیں اور صاحب مکاشفات ہونے کے علاوہ آنحضرت صلی اللہ علیہ وسلم کے حضوری بھی ہیں وہ نہ مرزا صاحب کے دعویٰ کو تسلیم کرلیتے۔ میں انہیں اس قسم کی عذرات لنگ پر بہتیرا سمجھاتا مگر وہ ایک وقت تک یہی رٹ لگاتے رہے۔ آخر میں نے انہیں کہا کہ بتاؤ کہ اگر حضرت میاں صاحب سیدومولا حضرت مسیح موعود قادیا نی علیہ السلام کو نبی اور امام مہدی تسلیم کرلیں تو کیا تم لو گ ان پر بدگمانی کرتے ہوئے حضور اقدس علیہ السلام کی بیعت سے انحراف تو نہیں کروگے اس وقت ان لوگوں میں سے بعض نے جواب دیا کہ یہ کس طرح ہوسکتا ہے کہ حضرت میاں صاحب مرزا صاحب پر ایمان لے آئیں اورہمارا سارا علاقہ ان کے پیچھے ایمان نہ لائے۔ احمدیت کے متعلق ان کی یہ آمادگی دیکھ کر میں نے حضرت تایا صاحب کی خدمت میں حاضر ہوکر درخواست کی کہ آ پ حضور اقدس علیہ السلام کی صداقت کے متعلق دعا کریں اوراستخارہ بھی فرمائیں۔ چنانچہ آ پ نے میری درخواست پر استخارہ شروع کر دیا اور میں نے آ پ کے لیے دعا شروع کردی۔ مجھے دعا کرتے ہوئے ابھی چند روز ہی گزرے تھے کہ میں نے خواب میں دیکھا کہ ہمارے گاؤں کے شمال کی جانب بہت سے لوگوں کا ہجوم ہے۔ جب میں وہا ں پہنچتا ہوں تو کیا دیکھتا ہوں کہ ایک چارپائی پر حضرت میاں علم الدین صاحب کی لاش پڑی ہوئی ہے اورلوگ اس کے اردگرد حلقہ باندھے ہوئے کھڑے ہیں۔ ان لوگوں نے جب مجھے دیکھا تو کہنے لگے کہ آپ ہمیشہ مرزا صاحب کے متعلق کہا کرتے ہیں کہ وہ امام مہدی اور مسیح موعود ہیں اگر واقعی وہ اپنے دعویٰ میں سچے ہیں تو آپ کوئی نشان دکھائیں۔ میں نے پوچھا کہ آپ کیسا نشان دیکھنا چاہتے ہیں؟ انہوں نے کہا کہ یہ میت جو ہمارے سامنے پڑی ہے اسے آپ زندہ کردیں۔ چنانچہ میں نے اسی وقت لاش کے سامنے کھڑے ہوکر نہایت جلال سے کہا: قُمْ بِاذْنِ اللّٰہ۔ میرا یہ کہنا تھا کہ حضرت میاں صاحب زندہ ہوکر بیٹھ گئے اور مجھے دیکھتے ہی السلام علیکم کہا۔ جب مَیں بیدارہوا تو مجھے یقین ہوگیا کہ حضرت میاں صاحب کو خداتعالیٰ ضرور حضرت سیدنا مسیح موعود علیہ السلام پر ایمان لانے کی سعادت نصیب کرے گا اور ایک نئی زندگی مرحمت فرمائے گا۔
اتفاق کی بات ہے کہ میں ایک دن مسجد میں بیٹھا ہوا لوگوں کو تبلیغ کر رہا تھا اور وہ اپنے سابقہ دستور کے مطابق حضرت میاں صاحب ممدوح کی آڑلے رہے تھے کہ اچانک آپ میری تلاش میں ادھر آنکلے اور دریافت فرمایا کہ میاں غلام رسول یہاں ہے؟ میں نے عرض کیا کہ حضرت میں حاضرہوں ارشاد فرمائیے۔ فرمانے لگے:’’مجھے خدا اور اس کے رسول کی طرف سے اس بات کا نہایت صفائی کے ساتھ علم دیا گیا ہے کہ حضرت مرزاصاحب خداتعالیٰ کے سچے مامور اور امام مہدی اور مسیح موعود ہیں اور آپ سب لوگ گواہ رہیں کہ میں ان پرایمان لے آیا ہوں۔‘‘ پھر آپ نے مجھے ارشاد فرمایا کہ میری بیعت کا خط حضرت صاحب کی خدمت میں لکھ دیں۔ حضرت میاں صاحب کے ارشاد گرامی کے بعد جب مَیں نے لوگوں سے پوچھا کہ بتاؤ اب تمہاری کیا مرضی ہے؟ تو اس وقت بعض بدبختوں نے کہا کہ شیطان نے بلعم باعورایسے ولی کا ایمان چھین لیا تھا حضرت میاں علم الدین صاحب کس شمار میں ہیں؟ اس کے بعد میں نے حضرت میاں صاحب موصوف کی بیعت کا خط لکھ دیا اور وہ بزرگ جو لوگوں کے زعم میں اپنے زمانہ کاغوث تھا حضور اقدس علیہ السلام کے سلسلہ بیعت میں داخل ہوگیا۔ پھر اس کے بعد خداتعالیٰ کے فضل سے میرے والد بزرگوارکے چھوٹے بھائی حضرت حافظ نظام الدین صاحب بھی احمدی ہوگئے۔ چنانچہ یہ دونوں بھائی یکے بعد دیگرے قادیان بھی تشریف لے گئے اورحضرت مسیح موعود علیہ الصلوٰۃ والسلام کی دستی بیعت سے مشرف ہوئے۔ الحمدللہ۔
(باقی آئندہ شمارہ میں ان شاءاللہ تعالیٰ)

=============================

(دوسری قسط مطبوعہ رسالہ انصارالدین ستمبرواکتوبر 2023ء)

دستِ غیب

دستِ شفا

تا ثیرِ دعا

کرشمۂ قدرت

دعائے مستجاب

دعا سے معجزانہ شفا

جھنگ شہر میں خدائی نشان

بَھدرک (اُڑیسہ )میں سلسلہ ٔ حقہ کی تائید

بھاگلپور میں تائیدِ الٰہی کا کرشمہ

غازی کوٹ ضلع گورداسپور میں ایک نشان

موضع مکھنا والی کاایک واقعہ اور کرشمۂ قدرت

دل کی نماز