قرآن تیرا رہبر ، چاہت کا یہ نشاں ہو … نظم

(مطبوعہ ’’الفضل ڈائجسٹ‘‘، الفضل انٹرنیشنل لندن 3؍ جولائی 2023ء)

روزنامہ’’الفضل‘‘ربوہ ۹؍دسمبر۲۰۱۳ء میں شاملِ اشاعت مکرم طاہر احمد محمود صاحب کی ایک نظم میں سے انتخاب ہدیۂ قارئین ہے:

قرآن تیرا رہبر ، چاہت کا یہ نشاں ہو
چمکے حسین تارا ، روشن ترا جہاں ہو
قرآن پڑھ کے آیا گوشہ مرے جگر کا
قرآن جب پڑھے تو دل میرا شادماں ہو
ہر دم یہی صحیفہ تم حرزِ جاں بنانا
اس ورد سے معطّر اور تر تیری زباں ہو
رحمت کا اِک نشاں ہے یہ سایۂ خلافت
سر پر ترے ہمیشہ یہ مثلِ سائباں ہو
سایہ فگن فرشتے رحمت لیے ہوئے ہوں
اور سایۂ خلافت ہر دَم ہی پُرفشاں ہو
پیارے ہوں جان و دل سے دونوں انعام تجھ کو
لازم ہو یہ خلافت ملزوم یہ قرآں ہو
جس سے ہے ساری برکت نام اس کا ہے محمدؐ
لاکھوں درود اُس پر قربان اس پہ جاں ہو